D Lämbbesitzig
Proloog:
Verblieht sinn scho d‘Mimoosemaihje, dˋFrau Fasnacht gange, ˋs Scheenscht verbyy
verdroggnet alli Faschtewaihje, scho laadet d´ Glygge wider yy!!
Bi dr soogenannte Lämbbesitzig, kunnt, was gsteert het, uf e Disch
(die Maischte nömme‘s ehnder witzig, willˋs Maischt Realsatire isch)
So hoggt me denn im Saal vom Schnaabel, bim Bier, und wartet, wär, was steggt
me ahnt, wär , vo dr Wält dr Naabel, ys wisse losst, was ihn beweggt
ˋs Protokoll ( Uusszuug):
Tatsächlig maint dr Pauli W.,
enttyscht vom Morgestraich
DAS Zmoorge kenn är nimme seh
dr Waihjeboode syyg vyyl z´waich!
Em Megge H. passt d´Lambbe nid,
dr Farbton syg vyyl z´häll
und denne wenns e Retraite git
lauf dr Vordraab zweenig schnäll
Dr Hampe maint e bitzli blass
Dä Schnyyder haig e Schaade
Bim schiffe wurdi ˋs Goschdym nass
ˋs bruuch drum e Hooselaade
Dr Haiggi findet: „ dˋKehr sinn zˋlang!“
är syg kai Waffelaifer,
und dass uf Kirzeri är blang;
jetz startet e Gegaifer!
Dr Zugchef maint, är selli schwyyge
und dass ihn das kuum interessieri
will zem dr Spaalebärg z´bestyyge
ärˋs mit sym Ranze nimm preschtieri
Dr Drummelchef, dä macht beliebt,
wills weh wurd due bim loose
as me wider vyyyyl meh iebt
Me dänggt: „Du kasch mer bloose“
Epiloog:
Dr Obmaa, nääbedra dr Vize, schryybe yyfrig Alles uff
( dr Vize isch au noh Novize, drum isch uf ihn no Kaine muff.)
Är danggt fir d‘ Offehait vo Alle, und dass me sicher luege wett
dass Alles, was me sait do inne, au gheerig Konsequänze hett!
Liebe Lääser, wirsch dängg ahne, was denn im näggschte Johr wird gscheh
giebt wird nid, und nundefahne, kai Brunzschlitz isch am Goschdym zˋgseh
Dr Vordraab retraitiert im goh, d´ Lambbe blybt häll im Ganze
D´Kehr blyybe sehr vyyl z’lang halt noh, fir dr Haiggi mit sym Ranze
Nur dr Waihjeboode, sälle blaiche, wo dr Pauli schregglig nennt
isch bim näggschte Morgestraich kai Waiche, nai, aber ferchterlig verbrennt.
Mätzli, im Merze 2018