• Trainer
  Dass dr Mäse nid dr Richtig isch, het me scho voreme Johr gwüsst. I weiss immer nonig für was füre Fuessball dasr stoht (d'Spieler allwä au nid), s'Team konstant uf Level bhalte isch au nid gange, Junig ibaue nur wenn nötig statt wenn möglig. In däm Johrtausig die schwächsti FcB-Saison, obwohls sie Johre nüm so eifach gsi wär, Meister z'wärde. Schad, e verschwändets Johr.
  Absoluts Plus aber: Är isch trotz gröschtem Theater in den 2 Johr immer e Ruhepol gsi. Het si Job gmacht und sich nid us dr Contenance lo bringe. Chapeau.
• Goalies
  Dr Omlin isch wäg, dr Nikolic floppt in jedem Match umenand sithär. Do sehni Bedarf nachere Ergänzig, wo nid nur Ergänzig isch, sondern vorläufit #1-Status inimmt.
• Verteidiger
  Cömert/Alderete solid bis sehr guet, im Friehlig nüm uf Level Herbst. Für Beidi wärs e Fähler, jetz e Wägsel nach Obe azsträbe, z'frieh. I will für se hoffe, das ssi guet berote wärde.
  Van der Werff weisi nid so rächt, solid eigentlig, aber au immer wieder mit dumme Fähler.
  Widmer im Verglich zu Vorsaisons e Top-Saison, aber so krassi Stelligsfähler und Ballonflangge-Fählischätzige seht me sunsch max no bi 14Jährige.
  Zum Riveros sagi lieber nüt, das dä macht het wenig mit organisiertem Fuessball z'tue, das isch für mi Level Pausehof. Total unkoordiniert und planlos.
  Dr Petretta lieferet als Usse-MF solidi Kost, witer hinde stagnierter scho länger. Trainer oder ebe doch zwenig für "mehr"?
• Mittelfeld
  Dr Pululululu hätt eigentlig Potenzial (Robist, schnäll, wändig, trickrich), isch aber leider komplett fuessballdumm. Dä sott mol e halbs Johr im Training usschliesslig in dere Gruppe dörfe mitmache, wo bim Mätschle 2x Ball beriehre als Regle het. Katastrophal die viele Fählentscheidige, und somit eigentlig nur e Ärgernis
  Frei hani solid gfunde
  Stocker als Teamleader wichtig, het in de Mätsch aber immer wieder Pausene dinne. Wobi dasr zwüsche de Pausene amigs sehr gueti Phasene het. Ändlig.
  Taulant im Friehlig nid uf sim Level. Mi Vermuetig/Behauptig isch, dassr sich sit dr C-Pause mitere Verletzig duregsücht het, dorum au immer wieder fählerhaft und körperlig uf sim Biss-Niveau
  Marchand. Für mi d'Entdeckig vo dr Saison. Ruhig und stargg wiene 30Jährige, isch mit jedem Isatz stärker worde. E Frächheit, dass är als beste Ma im Cupfinal usegno worde isch. Folgerichtig denn au, dass d'Entscheidig vo dört kunnt, wo är denn die letzte 10 Minute gfählt het. Merci Mäse!
  Campo... seufz.. Närvt ohne Ende mit sim Phlegma, sinere Zweikampfallergie, sinne dämlige Ballverlüst bim Zaubere und mit fählender Laufintensität. E Gartebad-Kicker vor dem Herrn. Spaziert aber regelmässig mit 1-3 Scorerpünkt vom Platz, also machtr doch nid Alles falsch. Im Friehlig usserdäm zT au mol afo Zweikämpf fiehre und retourseggle. D'Richtig würd also stimme, mues aber beschleunigt wärde. Schlendrian ustribe, denn wirds vilicht doch no irgendwenn. Nur, kanr das? Und verliertr denn nid sini Stärggene?
  Bunjaku. Als Iwägsler regelmässig überzügend, denn 1x dörfe afo, 2-3 Fähler gmacht, und wäg vom Fänster. Am Ändi halt au vom Marchand überflüglet worde.
• Angreifer
  van Wolfswinkel. Als reine Scorer (das wonr isch) losstr viel z'viel Grosschancene ligge, als Mittelfäldspieler oder gar Flügel nid tauglig, ergo richtig dass me dr Vertrag losst lo uslaufe
  Cabral. Kei Kommentar nötig, Maschine.
  Ademi. Nachere riesige Schwächephase gege Schluss wieder besser worde. Aber Zu Rächt maximal Stürmer #2
  Oberlin. E Mischig zwüsche Pululu und Riveros, aber in sine wenige Isätz nach dr Rückkehr hani irgendwie s'Gfühl gha dasr 2-3 Sächeli glernt het und am Lerne isch bezgl "wenn spielt me ab" und/oder "mues me immer dribble und wenn jo, worum immer dört wos am meiste Gegners het". Könnt evtl glich no wärde, an dr Bagge hämrn jo glich, also probiere
• Chefetage
  Verschwindet ändlig, ihr unsäglige Dilettante und niveaulose Bastarde! Und schmeissed vorhär no die gsamti Kommunikationsabteilig use, sofärns überhaupt no so Öbbis git. Grad kommunikativ mehr als erbärmlig, was do botte wordenisch und immer no botte wird. Aber Hauptsach die Hashtag-Idiotereie, komplett irrelevanti ESports-Kacke und das dümmlige vo A-Z überflüssige FcB-TV-Gedöns ohni jeglige Inhalt wird pusht... Abfahre mit so Schissdrägg und ändlig wieder afo kompetänt kommuniziere! D'Nummere vom JoZ händr jo hoffentlig no irgendwo!!!!
• Konklusion
  E verschänkti Saison. YB schwächelet, me hät (abgseh vom dämlige Herbst und verpatzte Ruggrundestart) ellei sit dr C-Pause mehrfach d'Mögligkeit gha, nid nume ufzhole, sondern d'Gegner vorzitig z'distanziere und hets verdublet, will me eifach vor Allem uswärts amigs nid so Luscht gha het, für das viele Gäld wome verdient au mol dr'Haxe anezhebe, e bitzeli gätzig ufzträtte und em Gegner wölle lästig wärde. Die Herrschafte häns offebar noni kapiert, dass dr Fc Basel 1893 schone Zittli nüm in dr Lag isch, mit 80% uf einere Arschbagge durch d'Saison z'spaziere. Dass sis könnte hän si vA international unter Bewis gstellt. E Truppe mit Stolz und Ehrgiz hät uf allne Ebene mehr usegholt. Do gits keini Usrede, au wenn dr Präsi e Leuggeli isch und dr sogenannti CEO e inkompetänte hinterfotzige Stinggstiefel, wichtich is aum Platz!!!
  
  Oder ebe, wichtig wär ufem Platz... gsi.

[quote="Kopfschüttler"|
Campo.... ych glaub "dä könnts", aber d Yyschtellig schtimmt maischtens nidd. Aigentlig miesst Disziplin und s fuessballerische Könne kombiniert wärde könne. Aber ebbe...

[/quote]

Warten wir es einmal ab - neue Trainer können Wunder wirken und Sforza scheint mir ein anderer Typ als Koller.