E guets Interview. Indentifikazioon mit dr Mannschaft isch scho e rächt schwierigs Thema, vor allem syt dr DD am Rueder isch. Ych glaub nit dass es je wieder esoo syy wird wie "sälbertsmool", aber das isch au bi andere Verain esoo.

E mänge verglycht jo die aggduell Situazioon mit dääre in Abstiigs-Säsong 87/88. Spoortlig maag das (bis jetz) esoo syy, "mental" isch es aber scho rächt anders. Sälbertsmool het me noch em "Last Minute"-Klasseerhalt (7:0 gääge Wettige uff dr Schytze, dr letsche Match under em Benthaus!) gwysst dass es schwierig wird. Vyyli Laischtigsdrääger sin gange und me isch mit ere zwaitklassige Mannschaft und em Sigi als Drääner in d Säsong. Uns alle isch klar gsii dass alles anderi als e Abstiig e Yberraschig wäär. Und es jo denn au esoo koo, immerhin knapper als erwaartet. Aber: me het bi jeedem wo s rootblaue Liibli aa gha het s Gfyhl kaa er risst sich dr A**** uff fir e Verain. Und hyyr isch es halt scho so dass nit alli därmasse motiviert wirgge, um's emool "nätt" uszdrugge. Ych hoff dr Celestini kaa das notwändige Fyyr zynde, eerschti Aasätz het me immerhinn scho gseh. Und die wo nit wänn - oder schlicht und aifach die notwändig Klass nit hänn - sell me ussortiere (au wenn si eerscht vor kurzem koo sinn...) und mit motivierte Junge ersetze.