Yep... ych ha au bitz Mieh ka mit dr lange "Fungg-Schtilli" sytens dr MK und ha scho befürchtet, me möcht das irgendwie under dr Teppig wüsche oder gar d Schuld vo sich wiise. Was bi de exischtierende Bilder (Video) jedoch schwer möglig gsi wär. Immerhin... e Schnällschuss hätt au nüdd brocht und dr Teggscht isch "okay", au wenn nadyrlig offeblibt, wie denn die Sälbschregulierigsmassnahme könnte ussgseh. Anderscht gsait... me ka au gar nüdd unternäh und s isch wiider alles in Ordning, me hetts im Griff. Bis es s näggscht mool glöpft.

Drumm find ych s au kai gueti Idee, wenn me sich uff dr Plattform drifft, unabhängig dervo, ob daas mit em FCB oder sogar dr Schuggerei abgsproche/bewilligt isch. Au wenn ych kai Fan vo Kollektivschtroofe bi (und zwar nidd, will ych au dervo betroffe bi...): Minere beschaidene Mainig nooch wär d MK guet beroote gsi, sich e bitz in Demuet z iebe , sich dä Schtiifel a z'zieh und em Match färnbliibe. Aifach als Zaiche, dass me dä Vorfall WIRGLIGG Ärnscht nimmt. Alles andere erweggt dr Yydrugg vo Unbelehrbarkeit und sini Inträsse wichtiger z näh, als alles anderi.

Die Aktioon nachem Cup-Schpiil isch wyt über "to much" gsi und ych ha ächt Mieh dermit, dass (nidd nur, aber ebbe au) genau die Gwaltbrieder sich am Sunntig "frisch, (fromm), fröhlich, frei" vorem Joggeli tummle, wo diräggt an dere Akzioon bedailigt gsi sinn. Daas isch ganz, ganz wyt wäg vo Sälbschtregulierig oder irgendwellne Massnahme.

Find au es isch ewäng lang gange. Dr Täggscht: jänusodenn, fir mi s Mindeschte vom Mindeschte.

Dernääbe find ych s Zämmekoo uff dr Plattform. Do sändet me e ganz schlächts Signal an d "Umwält". Derzue kunnt die potenziell Gfohr dass es wieder rääblet, eventuell sogar mit aagraiste Bäärner (ych hoff aber weenigschtens die sinn vernynftig und blyybe dehai). D MK hätt sich jo z.B. im Saal dräffe kenne und doodermit ewägg vom Schuss. Aber ebe, wie dr Kopfschüttler scho gschriibe het: es fählt aidyttig dr Wille zem e bitz Demuet zaige. Me nimmt sich nach wie vor z wichtig und legt e Sälbschtherrligkait an Daag wo zemindescht myni Weenigkait gewaltig näärvt (ybrigens scho längeri Zyt).