Ha dänggt ych mach emool e Fred uff fir die eenter unsääglig WM. Vyllicht luegt jo drotzdäm dr aint oder ander emool ewäng mit. Ych sälber wird das ab und zue mache, mi Agända isch aber bis zer Wiehnacht scho esoo gfyllt dass ych vyyli Spiil zwangslaifig verbasse wird, au zwai vo de drei Gruppespiil vo dr Schwyz. Und dernoo isch myner Mainig noch sowieso fertig mit ene, in dääre Gruppe wäärde si beschtefalls Dritte.

Mi Favorit isch Brasilie, mi "ghaime" Serbie, ych dängg die wäärde rächt wyt koo.

Ha über dr Midaag genau s Goal vom Embolo gseh. Kai Ahnig, wie si sunscht gschpiilt hänn, aber drey Punggt sinn im Droggene.
Und sunscht: Argentinie wird für die näggschte vier Joor gnuegg Öl ha, Spanie hett hoffentlig s Pulver geschter nidd scho verschosse und dr Ronaldo närvt.

PS: Und Kanada hett mi geschter sehr überrascht, aber nach 65 Min. isch d Luft duss gsi. Schlächt belohnt worde.

Ha bis jetz fascht nur Zämmefassige gseh. Ganz gail: s zwaite Gool vo Brasilie geschter zoobe! Sunscht: die Dytsche schyynts scho rächt am "hyppere" - dr Match gääge Spanie kennt no interessant wäärde, dä lueg ych denn vyllicht "live".

Drotz em Sieg gääge Kamrun: ych glaub immer no CH wiird numme Gruppedritte.

Gege Brasilie hänn si aständig gschuttet. Zume Unentschiide gege Serbie könnts länge. Wird aber schwer.

Ha au dä Match nit kenne luege. Und vo Serbie ha ych au kaine gseh. Vo däm häär kaa ych's nit yyschätze, dängg aber dass es e haissi sach gää wird...

CH wyter, ha ych nit erwaartet. Dr Match gääge Serbie isch stargg gsii, schappoo! Vor allem s dritte Gool, sehr gail!

Ych find's no guet schutte mer im Achtelfinal gääge Portugal. Wenn's gääge Südkorea gange wäär hätt e mänge dänggt "kai Brobleem, die pagge mer", jetz sinn mer eenter Ussesyter - wie letscht Joor gääge Franggryych...

CH dusse, daasch eenter pyynlig gsii geschter - fascht so schlimm wie mängmool dr FCB...

Fascht so schlimm? Nai... schlimmer. Kunnt allefalls an d Cup-Blamage gege Winterthur ane.

Dr Vordail... bi dr Nati närvt si mi vyyl weniger. Öbbe 2 Min. nach em Schlusspfiff isch dä Match vergässe gsi.

Maag's em Messi gönne!

Ych au. Scho elai, will ych dr Ronaldo nidd ka schmögge und ihm dr Messi jetzt uff ewig in dr Sunne stoht... ;-)