Emool eppis anders als Match-Vor- und Nochbetrachtige. Unseri Jungi Garde het d Ruggkehr vom Xherdan Shaqiri als Sujet mit em Titel "Shaq Attack". Als Goschdym hänn si e Adapzioon vom rootblaue und em griene FCB-Dress aa. D Larve isch e Haifisch-Kopf. Ych ha d Ehr ghaa dr Zeedel schriibe deerfe und erlaub mir dä als glaini Fasnachts-Yystimmig ins Forum z stelle.
«Erfolg isch nit alles im Lääbe Wenn’s schlächt goot sinn mir mit derbyy FCB-Fan kaasch nit wäärde FCB-Fan, daas muesch syy…»
Die Zyyle us eme Kurve-Lied Dreeschte in dr Noot Me singt si immer, wiird nit mied Wenn wiider ‘mool nyt goot Und daas isch syt de Heusler-Zytte Als wie mee bassiert Dr FCB, kaasch’s nit bestrytte Isch ins Mittelmass marschiert. Zwoor isch nit alles immer schlächt Me hoolt dr Schwyzergöp-Pokal Und au z Europa laufft’s no rächt Es längt sogar in Halbfinal. Doch letschti Saison: numme Kriise Mit Vogel’s Heiko wiird’s ganz schlimm Zemänd git’s nur e zimlig miise Achte Rang - als Fan maagsch nimm!
So luegt me nyydisch iiber d Gränze Wo die, wo ‘mool bi uns gsii sinn D Bäll erfolgryych ummeschlänze Und fyyre männge Titelgwinn. Dr Granit hoolt fir Leverkuuse Die allereerschti Maischterschale Und losst e Hammer-Siig-Gool uuse Im DFB-Pokalfinale. Dr Akanji uff dr Insle Gwinnt dr Titel mit ManCity D Konkurränz gheersch numme winsle Die finde «City» eenter «shitty». Und au em Sommer-Sonnyboy Laufft’s z Italie perfetto Als Inter-Gooli sait er: «Noi Abbiamo il Scudetto»!
Im Ussland aaber no mee gwunne Het e Augster Junioor Sy Palmarès isch fascht scho gspunne In de letschte dryyzää Joor: Meermools Maischter, Champions League Mit Liverpool und Bayern au Im Dytsche Göp au no zwai Siig Dr Xherdan isch die greeschti Schau! In de Meedie gänn’s em kessi Iibernämme: XS, Shaq Zauberzwäärg und Alpe-Messi Oder ebe: SHAQ ATTACK. Nit immer isch er eerschti Waal Hoggt männgmool uff em Bänggli Doch uns Basler isch’s egaal Soo ain zrugg haa wäär e Gschänggli…
Und uffsmool isch er wiider doo! Dausigi sinn zer Plattform koo Wo uff besseri Zytte blange Zem dr Xherdan S. empfange. D Euphorie rysst alli mit Im Fanshop isch dr Favorit Bi Alte, Junge, Männli, Wyybli S Shaqiri-Zääner-Lyybli. Won er denn uff e Raase laufft Isch s Joggeli fascht usverkaufft Zwoor will’s am Aafang noonig glinge Bi de Koleege d Bäss aabringe Doch in Winti laufft’s perfäggt: E Corner zirgglet är diräggt Ins Netz und isch au sunscht dr Bescht Bim Schytzewiise-Schytzefescht. Vo denn aa merggsch är fyylt sich wool E Hattrick, scheeni Freistoossgool Derzue isch d Mannschaft bissig woorde Wien e schaarfi Haifisch-Hoorde So wiird dr Xherdan als wie mee Zer Laitfiguur bim FCB Jetz au no Kapitään, drum bref: SHAQ ATTACK, är isch dr Scheff!
P.S.: Bi Redaggzioonsschluss vo däm Zeedel Isch Rootblau uff em zwaite Rang Das isch jo scho zimlig eedel Doch mir alli hänn dr Drang Im Mai uff unsrem Seibi z stoo Und d Mannschaft gsee dr Kiibel stämme Wo sii als Maischter hänn bikoo Und denn singe alli zämme:
«In dr Tabälle, sinn no Blätzli frei No wyter hinde, uff Blatz zwai oder drei S wiird eych nit gfalle, und zwoor eych alle, Vo Gänf bis uff St. Galle!»
Breathes there the man, with soul so dead Who never to himself hath said This is my own, my native land!
FCB-Poeten-Forum
Thema drucken
07.03.2025 07:41
Antworten
