Team: Hitz; Lopez, Adams, Pelmard, Calafiori; Xhaka, Burger, Kade, Males; Amdouni, Fink

Uswäggslige: Diouf fir Xhaka, Millar fir Males, Zeqiri fir Fink, Sène fir Amdouni, Novoa fir Kade

Resultat: 2:2

Gool: Males, Amdouni; Guillemenot, von Moos

Fans: 18'355

Und sunscht: Kaini 20'000 im Stadion - Bummelsunntig halt...

Ärgerlig, do wär mehr dinne glääge. Aber s bruuchti...

...mehr Abschlussglügg (scho wiider dä doof Pfoschte im Wääg)
...kai Ndoye
...kai VAR

Langsam dunggts mi, e schysst die Schiris, wo d Volketswil in e Käller gschpeert wäärde dört (verständligerwyys...) dermasse aa, dass si jedi Gläägehait nutze, zum sich unbeliebt mache, dermit dä unnötig Mischt wiider abgschafft wird. In Zuekunt wärde d Mätch alli 0-0 ände, will sich vor jedem Goal no irgend e Foulyywurf finde losst, wo sich e halb Stund vorhär eraignet hett. Daas Ganze macht so nidd nur kai Sinn, sondern dr Fuessball kaputt.

Eerschti Halbzyt guet, zwaiti eenter nit - wie scho letschte Donnschtig. Ych dängg s VAR-Unglygg/-Glyyg glyycht sich uff e Säsong uuse ainigermasse us, esoo wie das bi "normaale" Schiri-Fählentschaid dr Fall isch. Mir z.B. hänn jo in Sache VAR gääge Trabzonspor zimmlig Massel ghaa...

Drei Pinggt wääre mit Bligg uff d Tabälle geschter enorm wichtig gsii, aber jänusdodenn. Dr Ndoye isch scho e Ärgernis, worum dä immer spiile deerf resp. (wenn yberhaupt) spoot usgwägglset wird begriff ych nit. Genausowenig worum me geschter scho wieder dr Totalusfall Augustin brocht het und nit z.B. dr Fink (het denn no yyne deerfe aber jo numme fir die letschte Minute).

Under em Strich goot s Unentschiide in Oornig, ych ha ehrlig gsait nimme mit em Usglyych grächnet.

Scho klar, dass sich dä VAR-Blödsinn über kurz oder lang ussglyycht. Daas isch aber auch scho bi "nur" Schiris dr Fall gsi. Ergo hetts kai Verbesserig brocht und dermit bruuchts en nidd. Im Gegedail... d Verantwortig wird hi- und här "gschoobe", friehner hett si s Männli (ups.. Sorry.. oder Wyybli...) uff em Fäld ka und Schluss. Und s schlimmschte... Bi jedem Goal muesch Di efang zrugghalte mi Juuble, s könnt jo si, dass sich no so e Käller-Liiche mäldet. Absolute Unsinn.

Do gib ych Dir rächt, vyyl brocht het die Sach aigetlig nit. Schlimm dunggt mi dr "coitus interruptus" vo de Emozioone wo halt vor allem fir uns Fans e wichtige Bestanddail vom Fuessball sinn. Die vierehalb Minute vom letschte Donnschtig sinn jo abselut dernääbe gsii, so eppis goot gar nit!

VAR: Noch geschter in Manchester muess me wirgglig saage: Uffheere mit däm Saich!