Vyyl mee als das wo dr Kopfschüttler scho gschriibe het kunnt mer zue däm Desaschter vo geschter au nit in Sinn. Ych bi no sälte so gfruschtet zem Stadion us, wobyy dr Fruscht vor allem em Bligg in d Zuekumft resp. uff d Wieterfiehrig vo dr ebe grad aagfangene Säsong gschuldet isch. Emool ooni Europagöp find (oder "fänd", d Hoffnig stiirbt z letscht...) ych jo nit esoo schlimm, aber in dr Maischterschaft wäärde mer wohrschyynlig im Mittelfäld ummedymple und denn im Friehlig um dr Yyzuug in d "Finalrundi" bange miesse. Und wenn mer die verbasse git's wieder e Säsong ooni Europa, und das kennt scho no negativ yyschängge...
Und no eppis: geschter und au scho in St. Galle und gääge Benfica het sich zaigt dass dr Comas mit Abstand dr bescht IV isch wo mer hänn und yberhaupt aine vo Beschte im ganze Kader. Wenn dä goot isch "Guet Nacht am Säggsi".
1. Halbzyt ainigermasse okay, laider mit eme zimmlige Bogg vom Hitz. Noch dr Pause denn aber Basel sehr schwach. SG dailwyys im Powerplay, au scho vor em Blatzverwyys. Dooderzue: die eerscht Karte isch sehr hart, die zwait aber myner Mainig noch grächfertigt. Und irgendwie isch dr Barry sälber schuld, wenn scho gääl hesch settsch nit esoo yystiige. Vyllich hätt das jo au dr Drääner sette mergge und en friehner uusenää, vor allem au wil er aigetlig nyt brocht und e schwache Match gspiilt het. Au vom Dubasin het me nit vyyl gseh, ych hoff är het sich nit z fescht verletzt. Au wenn's deert hätt sette e Karte gää: ych ha dr Schiri jetz nit esoo schlimm gfunde - oder ha ych mi zemänd scho ans schwache Niveau vo de CH-Pfyffemänner gwehnt...?
Am Donnschtig goot's scho wyter, gratis "dangg" dr MK-Sperrig gääge YB.
Ych schätz YB, Lugano und Servette stärgger yy als dr FCB. Allefalls kennt's bi Servette ewäng Brobleem gää wenn dr Weiler nit yyschloot, drotzdäm wäärde si vor uns syy. Derhinter wäärde sich Basel, Luzärn, St. Galle und Zi!rü um d Blätz 4-7 strytte. Eventuell mischt Lausanne no mit (Uffstyyger-Schwung!).
In Sache Europa isch alles meeglig. Die letschte baide Joor hänn mer jo ammen e Penaltyschiesse bruucht zem in d Gruppephase koo. Scho Tobol isch kai Sälbschtlaifer vor allem wil dr FCB myner Mainig nooch alles andere als baraat isch. Ych bi jetz emool gspannt wie si sich hit zoobe in St. Galle schlehn, ha aber kai guets Gfyhl fir dä Match. => kaa me ybrigens doo gratis luege: https://www.youtube.com/watch?v=qLUV1AYO2F4
Zitat von Tuborg im Beitrag #14Und i bi au nid sicher inwiefärn dr Schulz mit sim "hart aber herzlich"-Kurs e guete Spirit ins Team bringt ehrlich gseit.
Yep, noch em OB-Spiil isch er au zimmlig harsch yberekoo im TeleBasel-Interview. Ych dängg aafangs Sebdämber resp. noch em Haimspiil gääge Zi!rü am 3.9. kaa me emool e eerschti Bilanz zieh, das isch s 5. Maischterschaftspiil und me waiss eb me in dr Confl.L.-Gruppephase isch. Zuedäm sett denn s Kader stoo wil jo s Transferfänschter denn (ändlig...) zue isch.
Ych nimm emool aa mit dr Abschaffig vom alte Modus isch au dr WSW gstoorbe. Zemindescht in dr alte Form kaa me dä Wettbewärb jo mit em "Schotte-Modus" nimme duurefiehre. Jänu, aber uff däm Wääg em Captain nomool vyyle Dangg fir's Uffrächt-Erhalte in de letschte Joor und nadierlig em Latti fir d Duurefiehrig in de vyyle Säsongs vorhär!
Geschter am Match gääge Benfica ha ych s eerscht Mool die Neie gseh spiile. Wobyy: vo de Herre Barry und Dubasin het me nit vyyl gseh, liigt au draa dass dr FCB vor allem in dr eerschte Halbzyt gääge voorne gar nyt z Stand brocht het. Dr van Breemen het mer kai schlächte Yydrugg gmacht, aber ebe, fir e wirggligs Urdail isch es no z frieh.
Im Allgemaine het mi dr FCB entdyscht. In knapp ere Wuche goot's los mit dr Maischterschaft, die dungge mi alles andere als baraat.
Zitat von Captain Sky im Beitrag #11Der sich nun abzeichnende Abgang von Pelmard ist jedoch ein herber Verlust:
Mittlerwyyle isch es laider definitiv. Au fir mi e rächte Verluscht an Defensiv-Subschtanz. Sett sich s Grycht um e Abgang vom Comas bewohrhaite wird's schwierig in Sache IV, do muess no Ersatz gfunde wäärde.
Au bi dääne baide in de Woort vom Kaiser Franz: 'schaunmermal.
Ych fänd's no toll wenn's klappe wuurd mit dr Verpflichtig vom Dominik Schmid, vor allem falls dr Calafiori goo wuurd. Scho ewägg isch jo dr Diouf; jänusodenn, mi dunggt dr Verluscht nit esoo schlimm, vor allem in Aabedracht vo de rund 10 Millioone wo die Sach yybrocht het.
Dr eerschti Nei-Zuegang. Aigetlig wie (fascht) immer bi in letschter Zyt verpflichtete Neie ha ych kai Ahnig eb dä eppis isch. Ych loss mi gäärn positiv yberrasche...
Geschter ha ych mit ewäng Wehmuet die zwait Halbzyt vom Final gluegt. Es het mi e eenter biidere Gingg dunggt, au die eerschte 45 Minute sinn schyynts gemäss Studioexpärte nit besser gsii. Ych dängg mir wääre nit emool eso chancelos gsii, aber jänusodenn. Zem Glygg het West Ham kurz vor Schluss no e Gool gmacht, e Verlängerig plus eventuells Penaltyschiesse hätt ych mir nimme aadoo.
Sodeli, jetz isch si ändlig umme, die Marathon-Säsong von FCB.
Au wenn normalerwyys bim Zrugg-Luege dr letscht Yydrugg dä isch wo's Urdail am maischte prägt: Ych ha's e zimmligi Schyss-Säsong gfunde, drotz em glaine "Happy End" vo geschter. Blatz 5 und doodermit grad no s letschte Billjéé leese fir d Conf.L. hätte mer letschte Juli no als lächerlig aagluegt, jetz mien mer dermit zfriide syy. Okay, d Euro-Campagne isch nätt gsii mit ere gaile Kulisse dehai gääge Fiorentina und e baar Härzschlaag-Spiil vorhär, aber zemindescht bi mir het amme d Entdyschig yber die dailwyys miserable Laischtige in dr Maischterschaft yberwiegt. Und no mee gnäärvt het mi s Verhalte vo gwysse Club-Exponänte. Vor allem bim Heiko bi ych froh dass dä nimme an dr Sytelinie stoot und hoffentlig au kuum me e Mikro vor d Naase griegt zem ummedaibele. Mängmool isch er richtig pyynlig gsii!
Dr bescht Spiiler uff die ganz Säsong gseh isch fir mi dr Hitz. Zwor het er dr aint oder ander Bogg ghaa, aber ooni iin wääre mer nit Fimfte woorde und au im Europagöp nit so wyt koo. Nadierlig gyltet das au fir dr Amdouni, aber dä het eerscht noch dr Winter- resp. WM-Pause dr Gnopf richtig uffgmacht. Dernääbe het's e huffe "Schwachstrom" im Kader, ych hoff do git's e gwyssi Berainigung. Laider wird's aber au unerwynschti Abgäng gää, vor allem dr Zeki wird ys wohrschyynlig verloo. Sunscht dunggt's mi no schwär zem Abschätze wie's Kader näggschti Säsong usgseht, luege mer emool.
Gspannt bi ych wie's mit de Säsong-Karte wytergoot. Es wird sich wyyse eb die Bryys-Erheehig zem jetzige Zytpunggt e intelligänti Sach isch. Scho vorhär ha ych in mym Umfäld dr aint oder ander Zwyyfel vernoo in Sache Verlängerig vo dr Karte, und syt dr Bryys-Aabassig gheer ych so Zyyg no meh. Fir mi besseri Helfti und mi isch klar dass mir verlängere, aber MK Parkett isch nadierlig vergliche mit andere Seggtoore e gynschtigi Sach. Au doo gyltet: 'schaunmermal...
E eenter langwyylige Match. Ych ha no sälte im Joggeli e Maischterschaftsspiil gseh mit so weenig Ballbsitz fir dr FCB. Zemänd mien mer zfriide syy mit däm Punggt, au wenn dr Usglyych kurz vor Schluss kurrlig und ärgerlich gsii isch. Aber ooni dr Hitz wäär dr Match zue däm Zytpunggt scho lang entschiide gsii. Doodermit isch au scho gsait/gschriibe wär mit Anstand dr bescht Basler gsii isch.
Numme no pyynlig find ych dr Heiko Vogel. Ych bi froh wenn dä nimme am dr Sytelinie und an de Interview-Mikrofon stoot.
Eventuell isch dä Punggt in Sach Blatz 5 Gold wärt, mir hänn d Europagöp-Quali jetz in de aigene Fiess!!
Uswäggslige: Novoa fir Kade, Essiam fir Frei, Augustin fir Zeqiri, Fink fir Males
Resultat: 1:3
Gool: Males; Celar (2x), Steffen
Fans: 23'176
Und sunscht: Wie scho noch em Fiorentina-Match gschriibe: D Luft isch duss, physisch und psychisch. Zemänd git's dr 6. oder 7. Blatz und doodermit kai Europagöp näggscht Säsong.