Ändlig wieder emool Baadefeerie! Mir gniesse zwai Wuche Sönnfönnändnassingtuduu am Strand. Mir mache das s eerscht Mool uff Kos und sinn dämentsprächend gspannt! Jamas!!
Vorgeschter isch dr Runrig-Sänger Bruce Guthro mit eerscht 62 Joor gstoorbe. Är het mir und mynere Familie zämme mit Runrig vyyli unglaublig scheeni Konzärt-Erlääbnis beschärt, z letscht am "Last Dance" resp. Runrig-Abschiedskonzärt im Auguscht 2018 bim Stirling Castle.
S Youtube-Video isch vom legendääre Rääge-Konzärt nääben em Urquhart Castle am Loch Ness. An sällem Auguscht-Samschtig im 2007 het's au fir schottischi Verhältnis gschifft wie no sälte, d Konzärt-DVD hänn si denn under em Namme "Year of the Flood" uusegää...
Vyllicht sett ych wirgglig emool ins Wettgschäft yystiige...
Ych ha noch em 0:2 nimme draa glaubt dass mi Tipp no yydrifft sondern eenter mit eme dritte Gool vo Zi!rü grächnet, was jo fascht au bassiert wäär. Dr Veiga isch e Maschiene, dä wird uns (hoffentlig...) no vyyl Fraid mache. Vo de andere Neie hänn mir dr Barisic und au dr Jovanovic no ainigermasse gfalle, bi de andere: luege mer emool. Me het halt scho gseh dass zwor rächt gueti Spiiler uff em Blatz stehn, aber zem Team mien si sich scho no finde. Vo däm häär kunnt d Nati-Pause grad rächt.
Dr Barry dunggt mi uff em Flyygel besser uffghoobe als in dr Mitti, drotzdäm het au geschter wieder fir e Slapstick-Yylaag gsorgt. Und dr Van Breemen längt aifach nit, sorry. Vo mir us kennt me dä grad wieder abgää.
Dr Egal? Hänn mer dä au no ghoolt?? Usglehnt oder fescht verpflichtet??? Wo het er bis jetz gspillt???? Welli Ruggenummere het er????? Frooge yber Frooge...
Jo, em Burger si Pass isch nadierlig e Saich gsii, aber dr Van Breemen het sich dernoo amateurhaft verhalte und jo au vorhär scho mänge Bogg zaigt. Und si Usraschter zimlig am Aafang won er uff e am Boode liigende Lausanner losgange isch hätt's au nit bruucht. Ych bliib derbyy, in dr jetzige Verfassig und em fählende erfahrene Nääbemaa isch er yberforderet, au wenn e nit unwääsentlige Dail vo dr Schuld an däm Zuestand bi de "Kader-Plaaner" liigt.
Wäägen em näggschte Match: bis denn isch dr Ärger wohrschyynlig ewäng verflooge und ych wird drotzdäm im Stadion syy. Esoo wien ych das in de letschte yber 50 Joor aigetlig immer gmacht ha, au wenn's schlächt gloffen isch (bi aine vo dääne mittlerwyyle rund 20'000 wo sälbertsmool Schattelsängdöni gseh hänn... ).
10. gääge 11. vo dr CH-Guggummere-Liga, dr Match het s erwaartet schlächte Niveau ghaa. Aber er baar Basler hänn's gschafft au das mit saggschwache Laischtige no z unerbiete. Was dr Barry und dr Augustin in HZ 1 botte hänn isch schlicht und ergriffend Arbetsverwaigerig. Zem Glygg hänn mer verloore, wenn die zwai no e Punggteprämie bikoo hätte wär's aifach numme e Frächhait gsii. Vo mir us kaa me die baide ussortiere, lieber no Lyt us dr U21 uffbiete als die zwai wyter mitschleppe.
Dr Van Breemen isch in unserer Liga yberfoorderet. Dä längt aifach nit. Vyllicht e baar Mool in dr U21 spiile losse. Oder halt sunscht dr Raase maie oder sunscht eppis mache losse, aber bitte nimme uffstelle. "Return to sender" goot jo laider - au bim Barry - nit...
Schmid: e Laischtigsdrääger bi GC und bi uns bis jetz e Flopp. Kade: schwach, sell doch aifach emool brobiere e Ball "normal" aanää, aber vyllicht kaa er das nit. Millar: dribblet sich sälber Gnyppel in d Bai, wenn d Gool 5m hooch und 14m brait wääre wuurd er vyllicht emool ains dräffe. Wirgglig guet: kaine. Aingermasse okay: dr Hitz und aasatzwyys dr Hunziker. Dr Räscht: Mittelmass, aber an dr undere Gränze.
Vogel: als Sportscheff unbruuchbar. Gang bitte, und zwar bevor nomool irgend e Pfyffe verpflichtisch.
Mir längt's fir e Momänt. Glaub dr Match in zwai Wuche loss ych us, mir verliere sowieso und die immer aggressivi Stimmig gääge Zi!rü goot mer jewyyle uff e Sagg.
Team: Hitz; Lang, Van Breemen, Djiga, Schmid; Burger, Essiam, Millar, Kade, Augustin; Barry
Uswäggslige: Hunziker fir Barry (=> wil gäälrootgfährdet), Vogel fir Essiam (Schmid ins MF), Onyegbule fir Augustin, Adjetey fir Lang, Junior Zé fir Kade
Resultat: 1:3
Gool: Millar (ändlig...), Sène (2x), Aigegool Van Breemen
Fans: 19'378
Und sunscht: Es längt aifach nit, z vyyl Verletzti/Abwääsendi/Gsperrti. Und die wo (no) doo sinn basse nit zämme resp. sinn kai Mannschaft.
Dä macht mer zer Zyt e zimlig fruschtrierte Yydrugg. Ych kennt mer no vorstelle dass er dr Bättel im Herbscht aaneschiesst wenn's esoo wytergoot resp. Ndoye, Calafiori, Burger etc. gehn und nyt Gschyyds verpflichtet wird. Wobyy: wenn er de Spiiler mangelndi Yystellig und Yysatzberaitschaft vorwirft schiesst er sich ewäng sälber ins Bai. Es isch doch u.a. Uffgoob vom Drääner e Mannschaft "haiss" z mache und uff e Gäägner yyzstelle, au wenn's Personal (bis jetz no) eenter Mittelmass isch. Wie scho in eme andere Fred gschriibe: uff mi macht dr FCB im Momänt in alle Belang e zimlig kabutte Yydrugg.
Ha numme dr Matchbricht uff SRF gseh. Wie scho mol gschriibe: hinde schwach und voorne nyt. Dä FCB isch im Momänt e kabutti Mannschaft. Und em Schultz si Nörgelei dernoo hilft nit wirgglig. Au wenn er rächt het, aber vyllicht isch er jo an däm Hiehnerhuffe au e bitzli tschuld.
Ych waiss nit wie me us däm Saich will uusekoo. Die wo no ewäng eppis sinn wäärde goo, und em Vogel drau ych nit zue eppis gschyyds z verpflichte. Druurigi Zytte fir uns alli...
Bis jetz isch jo in Sache Europagöp so zimmlig alles schief gloffe wo schieff laufe kaa (Usloosig, Hispiil mit (gääl-)roote Karte, Verletzige, jetz no Grangget vom Tauli, Verspeetig bi dr sowieso scho miehsaame Rais...).
S Wyterkoo wird e Herkules-Uffgoob fir dr FCB, und drotz Liechtbligg letschte Sunntig glaub ych nit dass es längt. Jänusodenn, git e baar freiji Donnschtig im Herbscht (unsere Drummel-Inschtruggter wird's fraie ).
Bis zum 1:1 wo ewäng us em Nyt koo isch ha ych dr FCB jetz nit grad berauschend gfunde. Und nochdäm me in St. Galle und gääge Tobol jewyyls in dr 2. Halbzyt abgschifft isch ha ych scho Beeses befyrchtet. Aber denn hänn si wider Erwaarte e Zahn zueglegt und e Zyttli lang wirgglig toll gschuttet. Aber noch em 3:2 s scho fascht erwaartete Zittere mit 6 Minute Nochspiilzyt, um so scheener d Erleesig mit eme tolle Konter zem 4:2. Mänofdemätsch nadierlig dr Ndoye, sy Kuss uff's Logo interpretier ych jetz eenter "Aadie zämme" als "Ych bliib no die näggschte 10 Joor"...
Ych waiss jo nit wie schlimm's bim Hitz usgseht, falls er länger usfalle sett bi ych no gspannt eb me uff dr Gooli-Bosizioon transfertechnisch aggtiv wird.
Drotz em Liechtbligg vo geschter glaub ych nit dass me am Donnschtig dr Karre no us em Drägg ziehe kaa, loss mi aber gäärn anderwyttig yberrasche...
Uswäggslige: Ainwonitverletztisch fir Ainwonitverletztisch, Ainwonitverletztisch fir Ainwonitgsperrtisch, Ainwonitverletztisch fir Ainwonitverletztisch, Ainwonitgsperrtisch fir Ainwonitverletztisch
Vyyl mee als das wo dr Kopfschüttler scho gschriibe het kunnt mer zue däm Desaschter vo geschter au nit in Sinn. Ych bi no sälte so gfruschtet zem Stadion us, wobyy dr Fruscht vor allem em Bligg in d Zuekumft resp. uff d Wieterfiehrig vo dr ebe grad aagfangene Säsong gschuldet isch. Emool ooni Europagöp find (oder "fänd", d Hoffnig stiirbt z letscht...) ych jo nit esoo schlimm, aber in dr Maischterschaft wäärde mer wohrschyynlig im Mittelfäld ummedymple und denn im Friehlig um dr Yyzuug in d "Finalrundi" bange miesse. Und wenn mer die verbasse git's wieder e Säsong ooni Europa, und das kennt scho no negativ yyschängge...
Und no eppis: geschter und au scho in St. Galle und gääge Benfica het sich zaigt dass dr Comas mit Abstand dr bescht IV isch wo mer hänn und yberhaupt aine vo Beschte im ganze Kader. Wenn dä goot isch "Guet Nacht am Säggsi".